PROLOCO SANT'ARPINO

Cerca nel sito

Vai ai contenuti

Menu principale:


Brava Gente

CULTURA

BRAVA GENTE

Don Ciccio ‘o prevete,
Ngelone…, Marchetiello…,
zì Munacella…,
‘o Bu…,
Palummiello…
“Che songo chisti nomme?”
Vuje dicite.
Ricorde antiche…,
ma vuje ‘un me capite!
So nomme care
sulo a chi, comme a me,
tene ‘e capille janche
e ‘e chieje a pelle.
So nomme antiche
‘e tantu tiempo fa
quanno campava ancora
Onnafà.
Chi so ricorda, mo?
Scugnava ‘e noce,
pure ‘o puorco scannava
pe mangià,
ma faceva ‘o sanzaro
pe campà.
Che brava gente!
Putesseno, pe poco,
riturnà!
Cu loro se n’è ghiuta
l’onesta.
Vituccio ‘o sarto
nu masto cusutore,
che nu vestito
ncuollo to pittava!
E don Felice?
Felice ‘e Cumparone…
‘o vino to serveva
int’ o stradone;
comme faceva
Ennesto ‘o Carrafaro
che pe l’amice
‘o pigliava ‘a int’o carrato.
Int’a cantina,
a chiazza Marì Atella,
teneva nu varrile
ca cannella;
ncapo ‘o purtone
na frasca sempe fresca
che, ntiempo ‘e Pasca,
ngignava ca ventresca.

A cummitive,
‘a gente furastiera
‘a Grummo, ‘a Fratta
‘a Cesa, ce veneva.
Ma primma,
addò Cunsiglia ‘a putecara
na capatella, sempe,
ce scappava.
Co pane frisco
(che addore se senteva!)
sasicce e capecuolle
ce metteva.
Che tiempe belle!...
E quanta brava gente!
Nucenzo,
Nottenotte,
Maurasiello!
Pe nun parlà
po, ‘e Cicciocappuccio
che durmeva ca scopa
sotto o vraccio!
E Ferdinando?...
‘o frate ‘e Malapelle!?...
Venneva ‘a limunata
a giarretelle
e ta serveva
ca scorza ‘e limone
mentre stenneva ‘a voce:
SO’ SPUMONEEEE!
‘A tengo ancora annanze
all’uocchie ‘a scena…
Ma ‘o nomme
a me chiù caro
è Filumena:
venneva ‘e spogne,
‘e mele passe e allesse…
Si chiure l’uocchie…
I ‘a sento
‘a Scucchiunessa:
ALLESSE…ALLESSE…
PASSETIELLE…
MELE COTTE…
VOLLE ‘A PULLANCA…
VOLLE.



(Poesia tratta da “Fuochi d’Artificio” di Antonio Sagliocco)


HOME PAGE | PRO LOCO | NOTE STORICHE DI SANT'ARPINO | SAGRA DEL CASATIELLO | CARNEVALE ATELLANO | ATELLA JAZZ | LA TRADIZIONE DELLA CANAPA | FESTA DEL SORRISO "AMEDEO D'ANNA" | PINACOTECA | RASSEGNA LETTERARIA | CULTURA | IL TENENTE MACRI' | RASSEGNA STAMPA | Link Utili | News | Mappa del sito


Torna ai contenuti | Torna al menu